សាររបស់សាកលវិទ្យាធិការ
សាររបស់សាកលវិទ្យាធិការ
សួរស្ដីប្អូនៗទាំងអស់គ្នា!លោកគ្រូសង្ឃឹមថាប្អូនៗពិតជាមានសេចក្តីសុខសប្បាយទាំងអស់គ្នា!លោកគ្រូសូមសម្តែងនូវការកោតសរសើរអស់ពីដួងចិត្តចំពោះការខិតខំប្រឹងប្រែងរៀនសូត្រអស់រយៈពេល១២ឆ្នាំរបស់ប្អូនៗ។ លោកគ្រូសង្ឃឹមយ៉ាងមុតមាំថា ឆ្លងតាមការខិតខំប្រឹងប្រែងរៀនសូត្រកន្លងមក ប្អូនៗទាំងអស់គ្នាប្រាកដជាទទួលបានជោគជ័យក្នុងការប្រឡង សញ្ញាបត្រមធ្យមសិក្សាទុតិយភូមិឆ្នាំសិក្សានេះ ។
លោកគ្រូជឿជាក់យ៉ាងមុតមាំថានៅក្នុងកាលៈទេសៈដ៏លំបាកនេះប្អូនៗទាំងអស់គ្នាពិតជាខិតខំប្រឹងប្រែងសិក្សារៀនសូត្រដើម្បីទទួលបានចំណេះដឹង និងវិធីសាស្ត្រល្អៗ ដើម្បីត្រៀមខ្លួនឈានទៅរកភាពជោគជ័យលើការប្រឡងសញ្ញាបត្រមធ្យមសិក្សាទុតិយភូមិ។ ទន្ទឹមនឹងនេះលោកគ្រូយល់ឃើញថា ដើម្បីធានាបាននូវការអភិវឌ្ឍជីវិតប្រកបដោយជោគជ័យ និងសម្រេចក្ដីស្រមៃរបស់ប្អូនៗ ព្រមទាំងរួមចំណែកអភិវឌ្ឍសេដ្ឋកិច្ចគ្រួសារ និងសង្គមជាតិ ប្អូនៗគួរតែជ្រើសរើសសាកលវិទ្យាល័យដើម្បីបន្តការសិក្សាឱ្យបានត្រឹមត្រូវក្នុងការទទួលបានជំនាញផ្នែករឹង(Technical Skills)និងជំនាញផ្នែកទន់(Soft Skills)ព្រមទាំងមានសមត្ថភាពក្នុងការប្រើប្រាស់ភាសាអង់គ្លេស ភាសាចិន បច្ចេកវិទ្យាព័ត៌មាន និងសារគមនាគមន៍ (ICT) និងមានឥរិយាបថល្អឆ្លើយតបទៅនឹងតម្រូវការទីផ្សារការងារជាតិ និងអន្តរជាតិ ។ លើសពីនេះសាកលវិទ្យាល័យដែលប្អូនៗត្រូវជ្រើសរើសនោះគឺជាសាកលវិទ្យាល័យដែលមានការទទួលស្គាល់គុណភាពអប់រំថ្នាក់ជាតិ និងអាស៊ាន ។
តាងនាមឱ្យសាកលវិទ្យាល័យ សៅស៍អ៊ីសថ៍អេយសៀ និងខ្លួនលោកគ្រូផ្ទាល់ លោកគ្រូសូមបួងសួងដល់អស់វត្ថុស័ក្តសិទ្ធិក្នុងលោក និងក្នុងព្រះរាជាណាចក្រកម្ពុជា ព្រមទាំងទេវតាឆ្នាំថ្មីសូមប្រសិទ្ធិពរជ័យសិរីសួស្ដីជ័យមង្គលវិបុលសុខ កម្លាំងពលំមាំមួន និងបញ្ញាញាណភ្លឺថ្លាដល់ប្អូនៗ ជាពិសេសលោកគ្រូសូមជូនពរឱ្យប្អូនៗទទួលបានជោគជ័យលើការប្រឡងសញ្ញាបត្រមធ្យមសិក្សាទុតិយភូមិខាងមុខនេះទាំងអស់គ្នាកុំបីឃ្លៀងឃ្លាតឡើយ ។
សាកលវិទ្យាធិការ
បណ្ឌិត មាន សុធី